دؤزومسوز
آياقلاريم
دونموش
دوشونجه م
دردلي اوره گيم
و اللريم
كي دويور
بوغدا سپه ن اللري
و سولان گوللري
گوزلريم آنير
آنامين آجي گولوشلرين
آتامين آجي باخيشلارين
و قاري لارين
نيسگيللي كئچميشين
آياقلاريم
دويور
قانلي يوللاري
وچورك وئرن تورپاغي
باخيشيم گورور
هله قوروماميش قانلاري
يوز ايل ليك گوزياشلاري
اللرده قالان گوزلري
و تزه قازيلان
درين گورلاري
ائشيديرم
آتامين يورولان سسين
ودردلي آدديم لارين
گورورم
موقددس اللرين
سؤنموش ايشيقلارين
قيريلميش چيراغين
و آنجاق
دوزومسوز آياقلاريم
گلميركي گئدم
كدرلي اوره گيم
سازا سوزه نمير
ومنده اولدوم
يئتيم دونيادا
داینشیر تانرییا،اؤزون سینامیش
هؤرونوب قایغییا باخیشدان ایراق
آجی بیرگولوشو بورج آلیب ندن؟
اولوبدور بورالار اوزاق بیر دوراق
بزه نیب نئچه ایل اونا بیر کفن
سون چاغی اونودوب چاققال آغیزدان
آلینیب،نئجه ده باغرینی ده لیب
آسلانلار بئله جه اولوب کاغیذدان
یارار وئرمه دی کی،سنه بوسئوگین
تکجه بیریولون وار،ماشین لاباسیل
اوجاغیم،بوجاغیم،سون بیردایاغیم
اوخولون سون درسی:"کندیردن آسیل"
او چاغلارکئچیبدی دییه ردین کی سن:
"حایاتین گولوشو سئوگی داغیم دیر
بو سئوگی تمیزدیر ، ندن قورونوم؟
گؤروشدن ایراغی ،آخشام چاغیم دیر"
بوسبوتون یالانمیش،سنه موشتولوق
زیروه سی اوچوبدور سنین هوسین
کؤنلونو آلیبدیر،گؤردون بیرگولوش؟
تئلیندن آسیلیب سون بیرنفسین
نه اعدام،نه قصاص،نه ده کی کندیر
هئچ بیری اؤده مز سندن اولانی
ایندی کی بورجلوسان دونن لرینه
ایچیمده بیر اؤلو اؤلموش ،باغیر دئییرلر اونا
آغیز دیلی ورم اولموش ، چاغیر دئییرلر اونا
گؤزومده قات-قاریشیق بیربولوددورعشق،آنجاق
قان آغلایاندا ، قولایجا یاغیر دئییرلر اونا
قودوز یابانچیلارین چکمه ایزلری ایله دولو
سینه مده جادده سالیبلار،جیغیر دئییرلر اونا
هاچاندی بیر آجی سانجی چکیر آنام تورپاغ
بو درد اونو بوغور آنجاق،دوغور دئییرلر اونا
بو یورد آتا-آنالی،کؤکلو-سویلو بیر یورددور
یئتیم دئییرلر اونا، آه، ساغیر دئییرلر اونا
و بیر کؤپک وطنیمده جینایت ایشلر لیکن
اؤزون ائله تانیدیر کی فاغیر دئییر لر اونا
منیم باهارچیچه ییندن ده اینجه دیرشئریم
توپانچا گولله لریندن آغیر دئییرلر اونا
قامیش قلم له قیزیل بیر غزل یازیرسام اگر
بو غم میتینگی دیر،آه،چال-چاغیردئییرلر اونا
ده میرعاشیق کیمی لال هئیکله دؤنن "کیانام"
و منده بیر اؤلو اؤلموش باغیر دئییرلر اونا
توکل کیانی اصل(کیان خیاو)
ای داغلارین گلین قیزی داغلار داریخمادا
چای لار سوسوز آخیر وبولاقلار داریخمادا
گل اوخشاما دئییر کوچه لر آغلاییر دووار
یوللار باشین یولور و یولاغلار داریخمادا
آه...گولدانین چیچک لریده اوز-گؤزون دیدیر
آه...باخچالار سولوخمادا باغلار داریخمادا
گلمیر آیاقلاریم ائوه-گلمیر سسین آنا
باغلاریمداباغلی-باغلی یاماغلارداریخمادا
گل-گل گولوم کی دام باجامیز،گؤزیاشین تؤکور
سن سیز بو پنجره بو اوتاغلار داریخمادا
دای بوش قالیب یئرین و بو دام داش گلیرمنه
گؤی یایلیقیندا ماوی ساچاقلار داریخمادا
گؤردوم باهار باهار باشیوا قارلامیشدی قار
یاس ساخلاییب ساچیندا داراقلارداریخمادا
سنده نئجه پاییزلادی ایستی گولوشلریم
منده قارالدی قالدی بو داغلار داریخمادا
کامیل قهرمان اوغلو
تاپپا-تاپ،
تاپماجادیر
بیر سوروشون نئیدی بو سس
-"تاپپدالانان حاقدی بو سس"
تانری یاردادیب
حاقدی سسی
دونیا دولوسو چالدی سسی
تانری قووشودو بو سسه
جوشغون اولدو اوره گیم،
دویغولاریم
داشقین اولدو بو سسه سئوگی لریم
تاپپا – تاپ،
بیر سورودور
آت سوروسو
بوجاغا توللادیلر
شنیمی،شنلیگیمی ائتدی کدر
ان بؤیوک آرزولاریم
اولدو هدر
دیله گیم،های –هاراییم بیتمه میشی
قیندا چوروتدو سسیمی
تانرینی ائتدی حزین
حاق سسی اولدوهدر
تاپپا-تاپ،
تاپماجادیر
بیر سوروشون هاردا بو سس
اؤلومو دویدوم آنجاق
اؤز مزار داشیما باخیب،بئله دئدیم:
"بو آغیللی مئیمونلار
بس هاچان اویاناجاق؟"
چؤرکچی تندیری کیمی سئویر سنی
باشماقچی بارماغی کیمی
اوزان سازی،فهله قوللاری کیمی
و من،
بوتون شاعیرلیگیم قدر سئویرم سنی
گؤزلرین تبریز گئجه لری ائی یار
من او گؤزو سئویرم کی
اوندا صمد بهرنگی نین ایزی وار
چیلپاق گونئی اوشاقلاری آیاق یالین دیلار
آیاق یالینلار،آیاقدا قالیرلار.
وگونئی ده چیلپاق دوغولان اوشاقلار
ایلک یوخسوللوقلا ایلگیلی.
اونلاری سئویندیرمز
نه قرافیک داغلار
نه مینیاتور باغلار.
فقط آجلیغی یاشاییب اؤلرلر،
بوتون گونئی قدر چیلپاق اوشاقلار!
بوینوم ایپده،
آغزیم شئعیر تامسینمادا
یانسیلاییرام اؤلمک آنینی.
حایاتا تاپشیرین منی سئومه سین
من چوخدان آداغلامیشام اؤلوم قیزینی.
آزادلیق دنیز قوخویور ،دئییرلر
حال بو کی بیزیم دنیز لریمیز
آزادلیق قوخویورلار
توکل کیانی اصل(کیان خیاو)
قبریستان...
اوخومالی سرگی
کتاب-کتاب ،درگی-درگی
جیلیدلر...
بایاتیلی،آغیلی
اولدو،اؤلدو ناغیلی
آی آللاه!
گؤره سن بویازیقلار
گؤیدن دوشن آلما پایلاریرینی یئدیلر؟
بیرینی اوخویورام اؤترگی:
"یاشار...
اون سگگیز باهار..."
داها هئچ بیر زاد اوخونمور
نه یامان الدن دوشوب بوقبیر داشی
گؤره سن یاغیش دؤیوب ...
یا آناسینین گؤز یاشی...؟
دونیالارگیلئیلی،دیری لر اؤلو
دومانلی زیروه لرقورودان قورو
یوخدویارارچی سی چاغلاییرزامان
یوللارسا دؤیونور،دولودور سورو
****
بوی آتیردیله گیم باغریمابیردن
آسیلیریارپاغی هرگونو گوندن
آغلاییر فلکین قورقولاریندان
کسیلیرتورپاغی هرگونو گوندن
****
دوغورساآنالارهرگون اوغوللار
بیرقاریش تورپاغی اونولا ایتگین
یولونور ساچلاری،آغلاماق سسی
کؤکوندن قیریلیب،اؤلومه سئچگین
****
بیردؤنه دؤنمه دن دونن کی لره
زوغ آتسین زیروه لریئرین جانیندان
آه،اینجه سسلری سسیندن آنلا
کؤرپه لر قالاجاق زامان قانیندان
****
ائللریم دؤیونور اوره یه بنزر
ایزلری گئدیب دیرهربیرنفسده
گئتمه یین گزمه یین ،دومان بئلینده
تاریخیم قالاجاق دومانلی سسده
دولانيرام
كوچه لري
ادديم اتيرام
خزل لرين اوستوندن
سوكوت چوكورديليمه
گوزلريمين اونونو الير
بيرشهر
كدراوره گيمه قونور
و كوك سالير
ياديمادوشور 1918 ايلي
و ايبليسين
كهنه اوبونو
قيريب-قيريب قان توكمه سي
ان موقددس مچيدلرين
يانديرماسي
سوكولمه سي
خوجالينين
169 عددي
موسلمانلار،قانين اچمك
و بويلوقادين لارين
تانري ائوينده اودا چكيلمه سي
و ايل لر بويو
دوستاقليغ چكن
قوتسا قاراباغ
يوزه ايگيرمي تورپاغيم
انا دوغما تورپاغيم
اولو تورانين ايريلميش اوره گي
بونلار هاميسي
بير تصادوف دئييل
بلكه
اونودولموش
قاراباغ دير
قوتسال قاراباغ
اذربایجان قیزیل قاندابوغولدون
کدرگه تدی سعادت سیزبیزاوچون
گنج لرین باخ دوشوبدور مئیدانا
یاشا یاشا دییه ن لرون واراولسون
عوموربویوسعادت سیز یاشادیق
قاپی قاپی اونوگه زن بیزاولدوق
نه اولدوسااو گه تیردی باشیما
قیزیل قاناباتان لارون واراولسون
ساوالانیم،سن داهی اغلاماسان
سهندیمین اخی قانی باتاجاق
خیرداتولکوبیردن اسلان اولاجاق
کوپک دوغار،اسلان دییه ن لراولسون
اسکی لردن بیزبوردایاشامیشیق
اوزیوردونداقریب اولان بیز اولدوق
اغلا اغلا اغلا وطنیم اغلا
ساوالانین،سهندین ده واراولسون
بیرگون اولدوق کدریوردون باشی بیز
بیرگون اولدوق اصیل سیزاذری بیز
نئیلییه ق کی الیمیزین دوزو یوخ
باکی،تبریز،اوتای،بوتای بیراولسون
عدالتین ایچیتده ییوق امما هئچ
عدالتی بیرثانییه گورمه دوق
عدالتی قاپی قاپی اختاردوق
اذربایجان میللتیمیز واراولسون
اذربایجان داریخماداای میللت
گنج لری قیزیل قانداایتیبدیر
قیزیل قانی هارالاردا باتیب دیر
قیزیل قانا باتان لارون واراولسون
اذربایجان کدرگونون گه لیب دیر
امماگه زون بوراخیلیب،گیزلی دیر
تورپاغیمین نوبه سی دیر،اغلاسین
هر گئجه
قورخولو گئجه
قارانلیق و دار بیر اوتاق
و بیر اینسان کی
قاندال قولوندا
قانا بویانمیش
اوره گینه قارانلیق ساچمیش
و سوچسوز
دوشونجه سی
و دیلی یاساق
بکله ییر
بیر سس و بیر ایز
کی
یئنی دن باشلاسین
باختینا نیسگیل دوغماسی
و اوره گینه
قان ساچماسی
اددیم لارین سسی
دوستاق دا کی دیلداشیمین
سئویرم ماهنی سی
و اسکی دن قاریمیش
ترسینه چالان
ظولوم چالقیسی
اددیم لارین سسی
اولدوره جک
دونیانی
اولدوره جک انالاری
و اولدوره جک
...؟
بیر ساغا بیر سولا بویلانیر اوره ک
بورداسا اورداسا کؤچری زامان
ساغالماز یاراسی اوره کده قالار
اؤگئی دیردوغمالار ،آنلار زامانلار
بوش اللر چؤکوبدو جیبلردیبینه
حیاتدا اؤلوم ده گومانا دؤنوب
گئییب سه شهرلرشنلیی گئییمین
دوغولورگؤرکم لر شنلیی لراوچون
یئریشین یولو ایللریورودوب
یئریش زورونا یوروشلر ائدیب
آددیم لار آغیر،چکه بیلمز او
بلکه بیرگونده یاتا بیله او
اللرقابارسا بختی سولوبدور
جیبلری بوشسا دامنی گئدیب
بارماقلار کیمسه یه اوخشاما دئییر
اؤلوم ده قالیم دادیل گیزلدیب دیر
کوچه ده بازاردا یاشماق وئریبدیر
چونکی باخیشلاری دنیالار قدر
آغیردیر باخمیر او کیمسه یه هئچ واخت
ایندیسه بوزامان گوللر تیکانلار
سو ایله اوددا یئرین ده گیشیب
دوستاقلاریانلیش دوستلوقلار کدر
هرگون هر سحر ساغالمیر یارا
گونشدن ایسه آسیلیر سئوینج
رؤیالار آرخایین یونگول بیرگئجه
آیاقلاریالین دی کوچه دن کئچه
دؤنموشم بورایا بیلمیرم نئجه
یونگوللوک یوکونو ساتمیشام هئچه
قانیمدان ایلانلاربؤیوک بیربیتیک
بوی آتیب یاندیریر هر سحر منی
دیسگینیب یوخودا ائله بیرایتیک
بیردؤنه دؤندرمز بیر تهر منی
آغریلار-سانجی لاراینجی تک چالیر
سیتقاییب،باخمایان بؤیوک بیرایلان
باغریمی ده لیرسه بوسبوتون قالیر
بوسبوتون غم لری چال-چاغیر،اینان
بیلمه دیم اورکدن گول بیته ن زامان
سارایلی کؤرپولر،سارایسیز اولدو
یاشادی دونیالار اؤلومه ، آمان
بیرده خان چوبانلار هارایسیز اولدو
گؤزومده تیکانلار اولورسا قات-قات
بیلمیرم، بونونلا نه اولسا منه
باخسالاراینسانلارمنه ده مات- مات
گؤز یوموب ،دونیادا نه بولسا منه
قوجامان غملی اؤلکه
بو اؤلکه،گؤزل اؤلکه
ساچلاری دنلی اؤلکه
(S.Q)
arşiv
əski yazılar
7/22/2008 - 8/21/2008
6/21/2008 - 7/21/2008
4/20/2008 - 5/20/2008
2/20/2008 - 3/19/2008
1/21/2008 - 2/19/2008
12/22/2007 - 1/20/2008
10/23/2007 - 11/21/2007
6/22/2007 - 7/22/2007
5/22/2007 - 6/21/2007
4/21/2007 - 5/21/2007
bağlantılar
نادر الهی-خیاولی شاعیر
شانلی قیز(یوللار)
شعرچلنگی
زینب پاشا
آذربایجان خبرلری
آل آلما
محمد قضایی
دوزلو اوغلان
سؤی اؤزونو
یوردوموز
تورکجه شعرلریم(تورکجه لیریک شعرلریم)
تورکجه شعرلریم(آنادیلیمده آنایوردوما شعرلریم)
قیویر-زیویر
آذربایجان مارالی
گلجک بیزیم دیر
آشیق گونش علی رمضانی
yaşayış
پیتیراق
قایا قیزی
zümrüd
سئوگی هئچ زامان سؤنمه ین بیر آلوودور
آیریلیق
باشماق
تورک اوغلو
دنیزه دؤنمک ایسته ییرم
آذربایجانین دان اولدوزلاری
اسماعیل خرمی
حمید آصفی
dodaktan kalba
مسعود هارای
دلنوشته بی صدا
مصطفی شیخ پور
حکیم تیلیم خانین حیاتی و شعرلری حاقدا
یالقیز آغاج
جیزما قارا(رامین جهانگیرزاده)
قالدیریم(ائلیاد موسوی)
محمد صفري(قارا سئودا)
آراز
اوچلوك
دوشونجه لر شلاله سي
دوشرگه
جولفا فداییلری
BLOGFA.COM