| تبليغات | X |
قاچیریق سئوگی باغیندا تارلالارلا لالایا
های هارای قوپدو او داغدان گئری دؤن سئوگی چایا
قوروب اووچو تله سین بوردا گؤرون قان تله سی
هله قورتولمامیش آنجاق اوو اولوب جان تله سی
ایکیمیز دان آلووق آه من آلوو سنده کؤز اول
ایکیمیز بیرجه دیلک له من دیلم سنده سؤز اول
کؤنلومه دامجی دامیرسا ایکیمیز سئلده یادیق
دارالیر دیلده سؤزوم،هئی،ایکیمیز ائلده یادیق
سورگون اولدوم بو ائلین سئللرینه سندن اوزاق
بو منم سئلده سارای،ائلده هارای،جانداسازاق
یاراشیرجاندا آلوولار،یاراشیر سئلده سارای
منی قایتارمنه،سئوگیم اولاجاق ائلده هارای
(S.Q)
منی هئچه پوچا یاشاماق یوروب
کاش ائلیمدن اؤترو اؤله بیلیدیم
اوره ییم اولایدی بیر تیکه چؤره ک
اونودا ائل ایله بؤله بیلیدیم
خلقین دوشمنینه اولایدیم یاغی
بیر گؤزده گؤریدیم قارانی آغی
بوتون انسانلاری انسان سایاغی
ایکی گؤزلریمده گیله بیلیدیم
کهنلتدیم دنیانین آز-چوخ تزه سین
داددیم مین نعمتین وارین مزه سین
دئمیرم تاپایدیم حیات گؤزه سین
بیرجه گؤز یاشینی سیله بیلیدیم
نادرم سئل ایچره سینیق گمیله
سینیشمیش عشقیمین کسیرکمیله
مین گؤز آغلاسامدا ائللر غمیله
دئمرم بیر آغیز گوله بیلیدیم
نادر الهی
بیر آغاجدان بوی آتمیشیق
یام یاشیل بیر آغاج
کؤکوموز بیر
دیلیمیز بیر
آتایلا آنامیز بیر
اؤزوموز یاد
سؤزوموز یاد
یابانچی باخیر دیلداشیم منه
سویوموز بوش.
محکمه ...
فیشقیراق چالاجاق محکمه چی
کؤکوموز سورگون اولدو
بیلمه م هارا !!!
بیر آغاجدان بوی آتمیشیق
قوپ قورو بیر آغاج
باشیندا حایات قورولور
کؤکو ایسه قورویوبدور
فیشقیراق چالیر محکمه چی
قویلانیر وطن
قویلانیر آنام
(S.Q)
